ಎನ್ನಂಥ ಭಕ್ತರು ಅನಂತ ನಿನಗಿಹರು - Ennantha Bhaktharu Anantha Ninagiharu

|| ಹರಿ ಸ್ತುತಿ ||

ಎನ್ನಂಥ ಭಕ್ತರು ಅನಂತ ನಿನಗಿಹರು 

ನಿನ್ನಂಥ ಸ್ವಾಮಿ ಎನಗಿಲ್ಲ

ನಿನ್ನಂಥ ಸ್ವಾಮಿ ಎನಗಿಲ್ಲ ಅದರಿಂದ 

ಭಿನ್ನೈಪೆ ನಿನ್ನ ಸಲಹೆಂದು || ಪ ||

ಪತಿತ ನಾನಾದರೂ ಪತಿತ ಪಾವನ 

ನೀನು ರತಿನಾಥ ಜನಕ ನಗಪಾಣಿ

ರತಿನಾಥ ಜನಕ ನಗಪಾಣಿ ನೀನಿರಲು 

ಇತರ ಚಿಂತ್ಯಾಕೊ ಎನಗಿನ್ನು || 1 ||

ಮನಗೊಳಗೆ ನೀನಿದ್ದು ಮನವೆಂದೆನಿಸಿಕೊಂಡು 

ಮನದ ವೃತಿಗಳನ್ನ ಸೃಜಿಸುವಿ

ಮನದ ವೃತ್ತಿಗಳನ್ನ ಸೃಜಿಸುವಿ ಸಂಕರ್ಷಣನೆ 

ನಿನ್ನ ಕರುಣಕ್ಕೆ ಎಣೆಗಾಣೆ || 2 ||

ನಾನಾ ಪದಾರ್ಥದೊಳು ನಾನಾ ಪ್ರಕಾರದಲ್ಲಿ 

ನೀನಿದ್ದು ಜಗವ ನಡೆಸುವಿ

ನೀನಿದ್ದು ಜಗವ ನಡೆಸುವಿ ಹರಿ ನೀನೆ 

ನಾನೆಂಬೋ ನನಗೆ ಗತಿಯುಂಟೆ || 3 ||

ಎನ್ನಪ್ಪ ಎನ್ನಮ್ಮ ಎನ್ನಯ್ಯ ಎನ್ನಣ್ಣ 

ಎನ್ನರಸ ಎನ್ನ ಕುಲದೈವ

ಎನ್ನರಸ ಎನ್ನ ಕುಲದೈವ ಇಹಪರದಿ ಎನ್ನ 

ಬಿಟ್ಟಗಲದೇ ಇರು ಕಂಡ್ಯ || 4 ||

ಏಸೇಸು ಜನ್ಮದಲಿ ದಾಸನಾ ನಿನಗಯ್ಯ 

ಈಶ ನೀನೆಂಬೋ ನುಡಿಸಿದ್ಧ

ಈಶ ನೀನೆಂಬೋ ನುಡಿಸಿದ್ಧ ವಾಗಿರಲು

ದಾಸೀನ ಮಾಡಲುಚಿತಲ್ಲ || 5 ||

ಆಶೆಯೊಂದುಂಟು ಸರ್ವೇಶಾ ವಿಜ್ಞಾಪಿಸುವೆ

ವಿಶ್ವಂಭರಾಭಾಗ್ಯ ಸತಿಮೋಹ

ವಿಶ್ವಂಭರಾಭಾಗ್ಯ ಸತಿಮೋಹ ತಪ್ಪಿಸಿ 

ನೀ ಸಲಹಬೇಕೋ ದಯದಿಂದ || 6 ||

ಅನಾಥ ಬಂಧು ಜಗನ್ನಾಥ ವಿಠ್ಠಲ 

ಪ್ರಪನ್ನ ಪರಿಪಾಲ ಮಾಲೋಲ

ಪ್ರಪನ್ನ ಪರಿಪಾಲ ಮಾಲೋಲ ಅರಿ 

ಪಾಂಚಜನ್ಯ ಧೃತಪಾಣಿ ಸಲಹೆಮ್ಮ || 7 ||