|| ಗುರು ಭಜನೆ ||
ರಾಗ :- ಗೌಳ
ತಾಳ :- ಛಾಪು
|| ಹಾವು ತುಳಿದೇನೆ |
ಮಾನುನಿ ಹಾವು ತುಳಿದೇನೇ ||
ಹಾವು ತುಳಿದು ಹಾರಿ ನಿಂತೆ |
ಜೀವ ಕಳವಳಿಸಿತೇ ಗೆಳತಿ ||
ದೇಹತ್ರಯದ ಸ್ಮೃತಿಯು ತಪ್ಪಿ |
ದೇವಾ ನೀನೇ ಗತಿಯು ಎಂದು ||
|| ಹಾವು ತುಳಿದೇನೇ ||
1. || ಹರಿಗೆ ಹಾಸಿಗೆಯಾದ ಹಾವು |
ಹರನ ಕೊರಳಲ್ಲಿರುವ ಹಾವು ||
ಧರೆಯ ಪೊತ್ತು ನಿಲುವ ಹಾವಿನ |
ಶಿರವ ಮೆಟ್ಟಿ ಶಿವನ ದಯದಿ
|| ಹಾವು ತುಳಿದೇನೇ ||
2. || ಬೋಧಾನಂದ ವಾಗಿ ಬರಲು |
ಹಾದಿಯೊಳಗೆ ಮಲಗಿ ಇರಲು ||
ಪಾದದಿಂದ ಪೊಡವಿಗೊತ್ತಿ |
ನಾದಗೊಳಿಸಿತು | ನಿಜದಿ ನೋಡಿ
|| ಹಾವು ತುಳಿದೇನೇ ||
3. || ಕಾರ ಅಡಗಿ ಊರ ಹೊರಗೆ |
ದಾರಿ ಕಟ್ಟಿ ತರುಬಿದಂಥ ||
ಘೋರ ತರದ ಉರಗ ಅದರ |
ಕ್ವಾರೆ ಹಲ್ಲು ಮುರಿದ ತೆರದಿ ||
|| ಹಾವು ತುಳಿದೇನೇ ||
4. || ಸತ್ಯ ಶಿಶುನಾಳಧೀಶನ |
ಉತ್ತಮ ಸೇವಕನಿಗೆ ||
ಕತ್ತಲೊಳು ಬಂದು ಕಾಲಿಗೆ |
ಸುತ್ತಿಕೊಂಡಿತು ಸಣ್ಣ ನಾಗರ ||
|| ಹಾವು ತುಳಿದೇನೇ ||
0 ಕಾಮೆಂಟ್‌ಗಳು