|| ಗಣಪತಿ ಸ್ತುತಿ ||
ರಾಗ : ಬೃಂದಾವನ
ಅಕ್ಷರ ಪುರುಷನೆ ಅಗಣಿತ ಮಹಿಮನೆ|
ಆದಿ ಪೂಜಿತನೆ ವಿನಾಯಕ ||
ಆನಂದಾಮೃತ ದರ್ಶಕ ಗಣಪನೆ |
ಆಗಮ ವಂದ್ಯನೆ ವಿನಾಯಕ ||
ಇಷ್ಟಸಿದ್ಧಿಗಳನೀಯುವ ಬೆನಕನೆ |
ಇಹಪರ ದಾಯಕ ವಿನಾಯಕ ||
ಈಶ್ವರ ಪುತ್ರನೆ ಈಪ್ಸಿತ ದಾತನೆ |
ಈರ್ಷಾ ರಹಿತನೆ ವಿನಾಯಕ ||
ಉತ್ತಮೋತ್ತಮನೆ ಉರಗ ಭೂಷಣನೆ |
ಉನ್ನತ ಮೂರ್ತಿಯೆ ವಿನಾಯಕ |
ವಿನಾಯಕ ಹೇ ವಿನಾಯಕ |
ವಿನಾಯಕ ಹೇ ವಿನಾಯಕ ||೧II
ಋಗ್ವೇದ ಪ್ರಿಯ ಋಷಿಗಣ ವಂದಿತ |
ಋಗಾದಿ ಮೂಲನೆ ವಿನಾಯಕ ||
ಎಲ್ಲ ಜೀವಿಗಳ ಕರುಣಿಪ ದೇವನೆ |
ದೈತ್ಯ ಕುಲಾಂತಕ ವಿನಾಯಕ ||
ಏಕಮೇವ ಅದ್ವಿತೀಯ ಪೂರ್ಣನೆ |
ಅತುಲೈಶ್ವರ್ಯನೆ ವಿನಾಯಕ ||
ಐಕ್ಯಮತ್ಯದಲ್ಲಿ ನಡೆಯುವ ನರರಿಗೆ |
ನೆಮ್ಮದಿ ನೀಡುವ ವಿನಾಯಕ ||
ಒಂದೇ ಮನದಲಿ ಭಜಿಸುವ ಭಜಕರ |
ಭವಭಯ ಕಳೆಯುವ ವಿನಾಯಕ ||
ವಿನಾಯಕ ಹೇ ವಿನಾಯಕ |
ವಿನಾಯಕ ಹೇ ವಿನಾಯಕ ||೨||
ಓಂಕಾರ ರೂಪನೆ ಓಂಶಕ್ತಿ ಗಣಪನೆ |
ಓಂ ಹರ ಸುತನೇ ವಿನಾಯಕ ||
ಔದಾರ್ಯಾಶ್ರಮ ಔತ್ಸುಕ್ಯ ದಾತನೆ |
ಔಪಾಸ್ಯ ಮೂರ್ತಿಯೆ ವಿನಾಯಕ ||
ಅಂಬಾ ತನಯನೆ ಅಂಜಿಕೆ ಕಳೆವನೇ |
ಅಂತರ್ಯಾಮಿಯೆ ವಿನಾಯಕ ||
ಅಃ ನಿನ್ನ ಮಹಿಮೆಯು ಅದ್ಭುತವಹುದಯ್ಯ |
ಅಮಿತಾನಂದ ಕೊಡು ವಿನಾಯಕ |
ವಿನಾಯಕ ಹೇ ವಿನಾಯಕ |
ವಿನಾಯಕ ಹೇ ವಿನಾಯಕ ||೩||
ಹರಿಹರ ಆನಂದ ಸರಸ್ವತಿ ರಚಿಸಿದ |
ಸ್ತೋತ್ರಕೆ ಕೃಪೆ ಮಾಡು ವಿನಾಯಕ ||
ಗುರುಚರಣಾಂಬುಜ ನಿರ್ಭರ ಭಕ್ತರ |
ಮರೆಯದೆ ಪಾಲಿಸು ವಿನಾಯಕ ||
ನಿನ್ನನೆ ಭಜಿಸುವೆ ನಿನ್ನನೆ ಹಾಡುವೆ |
ನಿನ್ನನೆ ಹೊಗಳುವೆ ವಿನಾಯಕ ||
ಉನ್ನತಿಯನು ಕೊಡು ಸನ್ಮತಿಯನು ಕೊಡು |
ಸದ್ಗತಿಯನು ಕೊಡು ವಿನಾಯಕ ||೪||
0 ಕಾಮೆಂಟ್‌ಗಳು