ಶ್ರೀರಾಮ ಸ್ತುತಿ - ಶ್ರೀ ರಾಮನೆಂಬೋ ನಾಮವ ನೆನೆದರೆ ಭಯವಿಲ್ಲಾ ಮನಕೆ

|| ಶ್ರೀರಾಮ ಸ್ತುತಿ ||

ರಾಗ : ಆನಂದಭೈರವಿ 

ತಾಳ : ಆದಿ 

ಶ್ರೀರಾಮನೆಂಬೋ|ನಾಮವ ನೆನೆದರೆ|

ಭಯವಿಲ್ಲಾ ಮನಕೆ|

ಮೂರು ಲೋಕಕೆ|ಕಾರಣಕರ್ತಾ|

ನಾರಾಯಣ ಜಗಕೆ॥ಪ.

ಮತ್ಸ್ಯವತಾರವ ತಾಳಿದ ರಾಮಾ|

ವೇದವ ತರುವುದಕೆ |

ಭೂಮಿಯ ಪೊಕ್ಕು ನೀರೊಳು ಮುಳುಗಿದ|

ವರಹವತಾರಕ್ಕೆ||೧. 

ಭೂಮಿ ದಾನವ ಬೇಡಿದ ರಾಮಾ|

ವಾಮ್ನವತಾರಕ್ಕೆ |

ಕರುಳನು ಬಗೆದು ಮಾಲೆಯ ಧರಿಸಿದ|

ಭಕ್ತನ ಸಲಹಲ್ಕೇ|೨.

ಅರಣ್ಯವಾಸವ ಮಾಡಿದ ರಾಮಾ|

ಜನಕನ ವಾಕ್ಯಕ್ಕೆ|

ಮಾವ ಕಂಸನ ಕೊಂದನು ಕೃಷ್ಣಾ|

ತಾಯಿಯ ಬಿಡಿಸಲೇ||೩

ಸತಿಯರ ವ್ರತಗಳನಳಿಸಿದ ಕೃಷ್ಣಾ|

ತ್ರಿಪುರರ ಗೆಲುವುದಕೆ|

ವಾಹನ ಬಿಟ್ಟು ತುರಗವ ನೇರಿದ|

ಕಲ್ಯವತಾರಕ್ಕೆ||೪.

ಶ್ಯಾಮಲ ವರ್ಣವ ತಾಳಿದ ರಾಮಾ|

ಸಾಮರ್ಥ್ಯನು ಜಗಕೆ |

ಸ್ವಾಮಿ ಶ್ರೀಪುರಂದರ ವಿಠಲನು ರಾಮಾ |

ಗೋವಿಂದನು ಜಗಕೇ || ೫.