|| ಗುರು ಸ್ತುತಿ ||

 ರಚನೆ : ಅಂಬಾಸುತ 

ಕರುಣಿಸಿದಾ ಗುರುನಾಥ.... ಕರುಣಿಸಿದಾ ಗುರುನಾಥ

ಕರುಣಿಸು ಎಂದು ಹನಿ ಕಣ್ಣಿರಿಡಲೂ....||ಪ||

ಕನವರಿಸಲು ನಾ ಕನಸಿನೊಳು ಬಂದು

ಕಂದ ಎಂದು ಎನ್ನ ಕುಂದುಗಳ ಮರೆತು....||ಅ.ಪ||

ತಾಳ ಮೇಳವು ಗುರು ಮನೆಯಾ ಮುಂದೆ

ಲೆಕ್ಕವಿಲ್ಲದ ಭಕುತರು ಅವನಾ ಹಿಂದೆ

ಗುರು ಹರಿ ಗುರು ಹರ ಗುರು ಬ್ರಹ್ಮ ಎಂದೆ

ಮೈಮರೆತು ಕುಣಿದು ಭಜಿಸಿರಲು ನಾಮವು ಒಂದೆ...||೧||

ದೂರದೊಳಿರುವ ನಾ ದೂರವೇ ನಿನಗೆಂದು

ಎನ್ನತ್ತ ನೀ ನೊಡಬಾರದೆ ಗುರುವೇ ಎಂದು

ಆ ಭಕುತರ ಪುಣ್ಯಕ್ಕೆ ಎಣೆ ಇಲ್ಲ ಎನಗೇನು

ಪರಮ ಪಾಪಿಯು ನಿನ್ನ ದೃಷ್ಠಿಗಗೋಚರನೂ...||೨||

ಎನುತಾ ಕಣ್ಣೀರ ಹಾಕಿ ಕೈ ಮುಗಿದು ನಿಂತಿರೆ

ಆ ಕ್ಷಣವೇ ಪ್ರತ್ಯಕ್ಷ ಕರುಣಿ ನೀನೆನ್ನ ಮುಂದೆ...

ವರ ಪ್ರಸಾದವ ಎನ್ನ ಕೈಗಿತ್ತ ವರಗುರು...

ಅಂಬಾಸುತನೆ ನಾನಿಹೆ ಕಾಯುವೆನು ಎಂದು...||೩||