ಆರತಿ ಹಾಡು (ದಶಾವತಾರ ಸ್ತುತಿ )
ಹತ್ತಾವತಾರವ ತಾಳಿದ ದೇವಗೆ
ಮುತ್ತಿನಾರತಿಯ ಬೆಳಗೀರೆ ||ಪ||
ಕುತ್ತು ಬರದ ಹಾಗೆ | ನಿತ್ಯ ಭಕ್ತರನಾ-
ಪತ್ತಿನಿಂದಲಿ ನಮ್ಮ | ರಕ್ಷಿಪ ದೇವಗೆ || ಅ.ಪ.||
ದುರುಳ ದಾನವನನ್ನು | ಕೊಂದು ವೇದವ ತಂದ
ಗಿರಿಯನ್ನು ಬೆನ್ನ ಮೇಲೆ|ಪೊತ್ತು ನೀರೊಳು ನಿಂತ ||
ಧರಣಿಯನುದ್ಧರಿಸಿ | ತರಳನ ಸಲಹಿದ
ವೀರವಟು ವೇಷದಿ | ದಾನ ಬೇಡುತ ಬಂದ ||೧||
ಭೂಮಿಯೊಳು ಕ್ಷತ್ರಿಯರ | ಕುಲನಾಶ ಮಾಡಿದ
ಆ ಮಹಾ ರಾವಣನ | ಕೊಂದು ಸೀತೆಯ ತಂದ ||
ಕಮಲಾಕ್ಷಿಯರೊಳು | ರಾಸಲೀಲೆಯಾಡಿದ
ರಮಣೀಯರ ವ್ರತ|ಭಂಗಗೈದ ಮೋಹನಾಂಗ||೨||
ಪುಂಡರ ಸದೆದು | ಕೆಂಡವ ಕಾರುತ
ಚಂಡ ಪ್ರಚಂಡನಾಗಿ | ಕುದುರೆಯನೇರಿದ ||
ಪಂಡರಿನಾಥ ಶ್ರೀ | ಗುರುಪ್ರಿಯ ವಿಠಲಗೆ
ಮಂಡೆ ಬಗ್ಗಿಸಿ | ಮಂಗಳಾರತಿ ಬೆಳಗಿರೆ ||೩||
0 ಕಾಮೆಂಟ್‌ಗಳು