|| ಶ್ರೀರಾಮ ಸ್ತುತಿ ||
ಶ್ರೀರಾಮ ಜಯರಾಮ ಜಯ ಜಾನಕಿ ರಾಮ
ರಘುರಾಮ ಗುಣಧಾಮ ಕೌಸಲ್ಯ ರಾಮ ||ಪ||
ನಿನ್ನ ನಾಮವ ಜಪಿಸಿ ಮನದಲ್ಲಿ
ದುರಿತ ದೂರಾಗುವುದು ಕ್ಷಣದಲ್ಲಿ
ನಿನ್ನ ಕರುಣೆಯ ಕಿಡಿ ಇರಲು ತಮದಲ್ಲಿ
ದುಃಖವು ಸರಿಯುವುದು ಮರೆಯಲ್ಲಿ ||೧||
ನಾನು ಎಂಬುದು ದಹಿಸಿ ನಿನ್ನೊಳಗೆ ಲೀನ
ಭಾವ ಭಕ್ತಿಯ ಹರಿಸಿ ರಾಮನಲ್ಲಿ ತಲ್ಲೀನ
ಇಹಪರಗಳೆಲ್ಲವೂ ಕೋದಂಡನ ಆಧೀನ
ಈ ಜಗವೇ ಶೂನ್ಯ ರಾಮ ನಿನ್ನ ವಿಹೀನ ||೨||
ಹನುಮನ ಹೃದಯದಿ ಬಂದಿಯಾದವನು
ಶಬರಿಯ ಭಕುತಿಗೆ ಸೋತು ಬಂದವನು
ಸುಜನರ ಪಾಲಿಸುವ ಪರಮಾತ್ಮನು
ಧರ್ಮವ ರಕ್ಷಿಸಿದ ಪುರುಷೋತ್ತಮನು ||೩||
ನೋಡಬೇಕಿದೆ ರಾಮ ನಿನ್ನ ಸಹನೆಯ ರೀತಿ
ಕಾಡಿ ಪಡಿಯುವೆ ರಾಮ ನೀನೆ ಸತ್ಯದ ಮೂರ್ತಿ
ದೂರವಾಗಿಸುವ ರಾಮ ದರ್ಪದ ಅನುಭೂತಿ
ಪಾಮರಗೆ ಕಲಿಸಿಕೊಡು ನಿನ್ನ ಸದ್ಗುಣ ನೀತಿ ||೪||
ಧೀರ ಗುಣ ಗಂಭೀರ ಸುಂದರರಾಮ
ಶಕ್ತಿ ಮುಕ್ತಿಯೋಳಿರುವ ರಾಜೇಂದ್ರ ರಾಮ
ಜಿತ ನೀನು ಪಿತ ನೀನು ಅನಂತ ರಾಮ
ಕಣಕಣದಿ ಇರುವೆ ಅನುಸೂಯಕ ರಾಮ ||೫||
0 ಕಾಮೆಂಟ್ಗಳು