||ಗುರು ಸ್ತುತಿ ||
ರಚನೆ : ಶ್ರೀ ಕೂಡಲೂರೇಶ
kannadabhajanlyrics.com
ಗುರುವೆ ನಿಮ್ಮಾಜ್ಞೆಯನು ಮೀರದೆ ನಡೆದವನು
ನರನೆನ್ನಲು ಬೇಡ ಅವ ಪರಮಾತ್ಮನು ||ಪಲ್ಲವಿ||
ಅರಿಯದ ಮನುಜರು ಅವರೇನು ಬಲ್ಲರು ।
ಪರಕೆ ಪರತರವಾದ ಪರವಸ್ತು ಅವನು ॥ ಅ.ಪ. ॥
ಹೆಪ್ಪು ಹಾಲಿಗೆ ಕೊಡಲು, ತುಪ್ಪ ಅದರೊಳಗಾಗಿ
ತುಪ್ಪ ಕೂಡುವುದೆ ಮರಳಿ ಹಾಲಿನೊಳು ।
ನಿಷ್ಪತ್ತಿ ನಿಜರೂಪನಾದಂಥ ಪುರುಷನು
ಅಪ್ಪಿ ಸಂಸಾರಕ್ಕೆ ಒಳಗಾಗನವನು ॥೧॥
ನದಿಯು ತಾ ಪುಟ್ಟಿ ಅದು ಸಮುದ್ರವ ಸೇರಲು
ನದಿಯು ತಾ ಪೋಗುವದೆ ಪುಟ್ಟಿದೆಡೆಗೆ ।
ಸದಮಲ ಸುಜ್ಜಾನಿ ಪ್ರಪಂಚ ಮಾಡಲು
ಅದರೊಳು ಕೂಡಿದರೂ ಬೆರೆಯನು ಅವನು ||೨॥
ಮುತ್ತು ನೀರೊಳು ಪುಟ್ಟಿ , ಮತ್ತೆ ನೀರಾಗುವದೆ |
ಮುತ್ತು ಲಕ್ಷಾಂತರಕೆ ಬೆಲೆಯಾದೀತು ।
ತತ್ತದ ಜ್ಞಾನಿಯವನು ಹುಟ್ಟುವ ನರನಲ್ಲ ।
ಅತ್ಯಂತ ಆನಂದ ಪರಿಪೂರ್ಣನವನು ॥ ೩॥
ಗರುಡನ ಮಂತ್ರವನು ಕಲಿತಿರುವಾತಗೆ
ಉರಗ ಕಚ್ಚಿದರೇನು ವಿಷವೇರುವದೆ ।
ಪರಿಪರಿ ವಿಷಯದೊಳ್‌ ಮುಳುಗಾಡಿದರಾತಗೆ
ಧರ್ಮ ಕರ್ಮಗಳಿಂದ ಆತನಿಗೇನು ॥ ೪॥
ಜಾತಿಯೊಳಗೆ ಹುಟ್ಟ ಅಜಾತನಾದವಗೆ
ಜಾತಿ ಧರ್ಮಗಳಿಂದ ಆತನಿಗೇನು ।
ಜ್ಯೋತಿಪ್ರಕಾಶ ನಮ್ಮ ಕೂಡಲೂರೇಶನು
ದಾತ ಪ್ರಖ್ಯಾತ ಅವಧೂತನವನು ॥೫॥
0 ಕಾಮೆಂಟ್‌ಗಳು