|| ಹರಿ ಭಜನೆ ||
ಪರಮ ಪಾಪಿಷ್ಠ ನಾನು || ಪ |।
ನರಹರಿಯೆ ನಿನ್ನ ನಾಮಸ್ಮರಣೆ ಮಾಡದೆ ।
ನರಕಕ್ಕೆ ಗುರಿಯಾದೆನೋ । ಹರಿಯೇ ||ಅ.ಪ||
ಕೆರೆ ಭಾವಿ ದೇವ ಮಂದಿರಗಳನು ಕೆಡವಿ
ನಾ ಹಿರಿದಾಗಿ ಮನೆ ಕಟ್ಟಿದೆ ।
ನೆರೆನಡೆವ ಮಾರ್ಗದಾ ಅರವಟ್ಟಿಗೆಗಳನು
ಥರಥರದಿ ಬಿಚ್ಚಿ ತೆಗೆದೆ ।
ಪರಮ ಸಂಭ್ರಮದಿಂದ ಅರಳೆಯಮರ
ಕಡಿಸೆ ಕೊರೆಸಿ ಬಾಗಿಲ ಮಾಡಿದೆ ॥
ವರಮಂದಿರವ ಮುಗಿಸಿ ಹರುಷ ಚಿತ್ರವ ತೆಗೆಸಿ
ಪರಿಪರಿಯ ಸೌಖ್ಯ ಸುರಿದೆ ಮೆರೆದೆ ||೧||
ಹೊಸ ಮನೆಯ ಕಂಡು ಬಲು ಹಸಿದು
ಭೂಸುರರು ಬರೆ ಕೊಸರಿ ಹಾಕುತ ದಬ್ಬುತಾ |
ಶಶಿಮುಖಿಯೇ ಬಾರೆಂದು ಅಸುವನೆ ಬಣ್ಣಿಸುತ
ಹಸನಾಗಿ ಅವಳೊಲಿಯುತ
ದಶಮಿ ಏಕಾದಶಿ ದ್ವಾದಶಿ ದಿನತ್ರಯದಿ
ಅಶನವೆರಡು ಹೊತ್ತುಣ್ಣುತಾ |
ಘಸಘಸನೆ ತಾಂಬೂಲ ಪಶುವಿನಂದದಿ ಮೆದ್ದು
ಕುಸುಮಗಂಧಿಯ ರಮಿಸುತಾ । ಸತತಾ || ೨॥
ಸ್ನಾನ ಸಂಧ್ಯಾನ ಅತಿಮೌನ ಗಾಯತ್ರಿಜಪ
ಭಾನುಗರ್ಘ್ಯವನು ಕೊಡದೆ ।
ಶ್ರೀನಿವಾಸನೆ ನಿನ್ನ ಜ್ಞಾನಪೂರ್ವಕ ಪೂಜೆ
ನಾನೊಂದು ಕ್ಷಣ ಮಾಡದೆ ।
ಬೇನೆ ಬಂದಂತಾಗಿ ಹೀನ ಸಕೇಶಿಯ ಕೈಲಿ
ನಾನಾ ವಿಧಾನ್ನ ಉಂಡೆ ।
ಜೀನತ್ವದಲಿ ದುಡ್ಡು ದಾನ ಧರ್ಮವ ಕೊಡದೆ
ಶ್ವಾನನಂದದಿ ಚರಿಸಿದೆ । ಬರಿದೆ ||೩||
0 ಕಾಮೆಂಟ್‌ಗಳು