ದುರ್ಗಾ ಸ್ತುತಿ - ಭವತಾರಿಣಿ ನವರಾತ್ರಿಯ ದೇವಿ, Bhava Tharini Navaratriya Devi

|| ದುರ್ಗಾ ಸ್ತುತಿ ||

ರಚನೆ : ಮತ್ತೂರು ನಂದಕುಮಾರ.

ಭವತಾರಿಣಿ ನವರಾತ್ರಿಯ ದೇವಿ

ದುರ್ಗೇ ತಾಯಿ ಭವಾನಿ |

ಮಮ ಮಾತರ್ನಮೋ - ಹರಸೌ

ಶಂಕರಿ ಸೇವಕರಾವು ಶಿವಾನಿ | ಪ ||

ನೀನೇ ಮಂಗಳೆ ನೀನೇ ಸರಸತಿ

ನೀ ಲಕ್ಷ್ಮಿಯು ಪರಮೇಶಿ |

ನೀ ಜಯಕಾರಿಣಿ ನೀ ಶುಭದಾಯಿನಿ

ಮರೆತರೆ ನಾ ಪರದೇಶಿ || ೧ ||

ಹರಿಯುವ ನೀರಲಿ ಚಿಗುರಿದ ಎಲೆಯಲಿ

ಅರಳುವ ಹೂವಲಿ ನೀನು |

ತಾಯಿಯ ಅದ್ಭುತ ಮಾಯೆಯ ಕಂಡೆನೆ

ಭವದಲಿ ವಿಸ್ಮಿತ ನಾನು || ೨ ||

ಭುವಿಯೊಳಗೆಲ್ಲೆಡೆ ನಿನ್ನದೆ ಬಿಂಬ

ಗಿರಿಗುಹ ಕಾನನ ನೀನೆ |

ಮಹಿಮೆಯನರಿವಡೆ ತರವೇ ಮಾತಃ

ಅರಿವಿನ ಆಚೆಗು ನೀನೆ || ೩ ||