ನರನಾದ ಮೇಲೆ ಹರಿನಾಮ ಜಿಹ್ನೆಯೊಳಿರಬೇಕು - Naranaada Mele Harinama

|| ಶ್ರೀಹರಿ ಸ್ತುತಿ ||

ನರನಾದ ಮೇಲೆ ಹರಿನಾಮ ಜಿಹ್ನೆಯೊಳಿರಬೇಕು||ಪ||

ಭೂತದಯಾಪರನಾಗಿರಬೇಕು 

ಪಾತಕವೆಲ್ಲ ಕಳೆಯಲಿಬೇಕು 

ಮಾತು ಮಾತಿಗೆ ಹರಿಯೆನ್ನಬೇಕು ||೧||

ಆರುವರ್ಗವನಳಿಯಲಿಬೇಕು 

ಮೂರು ಗುಣಂಗಳ ಮೀರಲಿಬೇಕು 

ಸೇರಿ ಬ್ರಹ್ಮನೊಳಿರಬೇಕು ||೨||

ಅಷ್ಟಮದಂಗಳ ತುಳಿಯಲಿಬೇಕು 

ದುಷ್ಟರ ಸಂಗವ ಬಿಡಬೇಕು 

ಕೃಷ್ಣ ಕೇಶವ ಎನ್ನಬೇಕು ||೩||

ಬಂದದ್ದುಂಡು ಸುಖಿಸಲಿಬೇಕು 

ನಿಂದಾಸ್ತುತಿಗಳ ತಾಳಲಿಬೇಕು 

ತಂದೆ ಪುರಂದರವಿಠಲ ಎನಬೇಕು ||೪||