ಶಂಕರಾಚಾರ್ಯ ಸ್ತುತಿ - ಮುದಾ ಕರೇಣ ಪುಸ್ತಕಂ ದಧಾನಮೀಶರೂಪಿಣಂ

 || ಶಂಕರಾಚಾರ್ಯ ಸ್ತುತಿ ||

ಮುದಾ ಕರೇಣ ಪುಸ್ತಕಂ

ದಧಾನಮೀಶರೂಪಿಣಂ

ತಥಾಽಪರೇಣ ಮುದ್ರಿಕಾಂ

ನಮತ್ತಮೋವಿನಾಶಿನೀಮ್ |

ಕುಸುಂಭವಾಸಸಾವೃತಂ

ವಿಭೂತಿಭಾಸಿಫಾಲಕಂ

ನತಾಘನಾಶನೇ ರತಂ

ನಮಾಮಿ ಶಂಕರಂ ಗುರುಮ್ ||

ಪರಾಶರಾತ್ಮಜಪ್ರಿಯಂ

ಪವಿತ್ರಿತಕ್ಷಮಾತಲಂ

ಪುರಾಣಸಾರವೇದಿನಂ

ಸನಂದನಾದಿಸೇವಿತಮ್ |

ಪ್ರಸನ್ನವಕ್ತ್ರಪಂಕಜಂ

ಪ್ರಪನ್ನಲೋಕರಕ್ಷಕಮ್

ಪ್ರಕಾಶಿತಾದ್ವಿತೀಯತತ್ತ್ವ­

ಮಾಶ್ರಯಾಮಿ ದೇಶಿಕಮ್ ||

ಸುಧಾಂಶುಶೇಖರಾರ್ಚಕಂ

ಸುಧೀಂದ್ರಸೇವ್ಯಪಾದುಕಂ

ಸುತಾದಿಮೋಹನಾಶಕಂ

ಸುಶಾಂತಿದಾಂತಿದಾಯಕಮ್ |

ಸಮಸ್ತವೇದಪಾರಗಂ

ಸಹಸ್ರಸೂರ್ಯಭಾಸುರಂ

ಸಮಾಹಿತಾಖಿಲೇಂದ್ರಿಯಂ

ಸದಾ ಭಜಾಮಿ ಶಂಕರಮ್ ||

ಯಮೀಂದ್ರಚಕ್ರವರ್ತಿನಂ

ಯಮಾದಿಯೋಗವೇದಿನಂ

ಯಥಾರ್ಥತತ್ತ್ವಬೋಧಕಂ

ಯಮಾಂತಕಾತ್ಮಜಾರ್ಚಕಮ್ |

ಯಮೇವ ಮುಕ್ತಿಕಾಂಕ್ಷಯಾ

ಸಮಾಶ್ರಯಂತಿ ಸಜ್ಜನಾ-

ನಮಾಮ್ಯಹಂ ಸದಾ ಗುರುಂ

ತಮೇವ ಶಂಕರಾಭಿಧಮ್ ||

ಸ್ವಬಾಲ್ಯ ಏವ ನಿರ್ಭರಂ

ಯ ಆತ್ಮನೋ ದಯಾಲುತಾಂ

ದರಿದ್ರವಿಪ್ರಮಂದಿರೇ

ಸುವರ್ಣವೃಷ್ಟಿಮಾನಯನ್ |

ಪ್ರದರ್ಶ್ಯ ವಿಸ್ಮಯಾಂಬುಧೌ

ನ್ಯಮಜ್ಜಯತ್ ಸಮಾನ್‍ಜನಾನ್

ಸ ಏವ ಶಂಕರಸ್ಸದಾ

ಜಗದ್ಗುರುರ್ಗತಿರ್ಮಮ ||

ಯದೀಯಪುಣ್ಯಜನ್ಮನಾ

ಪ್ರಸಿದ್ಧಿಮಾಪ ಕಾಲಟೀ

ಯದೀಯಶಿಷ್ಯತಾಂ ವ್ರಜನ್

ಸ ತೋಟಕೋಽಪಿ ಪಪ್ರಥೇ |

ಯ ಏವ ಸರ್ವದೇಹಿನಾಂ

ವಿಮುಕ್ತಿಮಾರ್ಗದರ್ಶಕೋ-

ನರಾಕೃತಿಂ ಸದಾಶಿವಂ

ತಮಾಶ್ರಯಾಮಿ ಸದ್ಗುರುಮ್ ||

ಸನಾತನಸ್ಯ ವರ್ತ್ಮನಃ

ಸದೈವ ಪಾಲನಾಯ ಯಃ

ಚತುರ್ದಿಶಾಸು ಸನ್ಮಠಾನ್

ಚಕಾರ ಲೋಕವಿಶ್ರುತಾನ್ |

ವಿಭಾಂಡಕಾತ್ಮಜಾಶ್ರಮಾದಿ­

ಸುಸ್ಥಲೇಷು ಪಾವನಾನ್

ತಮೇವ ಲೋಕಶಂಕರಂ

ನಮಾಮಿ ಶಂಕರಂ ಗುರುಮ್ ||

ಯದೀಯಹಸ್ತವಾರಿಜಾತ

­ಸುಪ್ರತಿಷ್ಠಿತಾ ಸತೀ

ಪ್ರಸಿದ್ಧಶೃಂಗಭೂಧರೇ

ಸದಾ ಪ್ರಶಾಂತಿಭಾಸುರೇ |

ಸ್ವಭಕ್ತಪಾಲನವ್ರತಾ

ವಿರಾಜತೇ ಹಿ ಶಾರದಾ

ಸ ಶಂಕರಃ ಕೃಪಾನಿಧಿಃ

ಕರೋತು ಮಾಮನೇನಸಮ್ ||

ಇಮಂ ಸ್ತವಂ ಜಗದ್ಗುರೋ­

ರ್ಗುಣಾನುವರ್ಣನಾತ್ಮಕಂ

ಸಮಾದರೇಣ ಯಃ

ಪಠೇ­ದನನ್ಯಭಕ್ತಿಸಂಯುತಃ |

ಸಮಾಪ್ನುಯಾತ್ ಸಮೀಹಿತಂ

ಮನೋರಥಂ ನರೋಽಚಿರಾತ್

ದಯಾನಿಧೇಸ್ಸ ಶಂಕರಸ್ಯ

ಸದ್ಗುರೋಃ ಪ್ರಸಾದತಃ ||