ಭಕ್ತಿ ವೈರಾಗ್ಯ ಪ್ರಕರಣ - ಯಾವ ಕರ್ಮವೋ ಶಿವಶಿವದ್ಯಾವ ಕರ್ಮವೋ

|| ಭಕ್ತಿ ವೈರಾಗ್ಯ ಪ್ರಕರಣ ||

ಯಾವ ಕರ್ಮವೋ ಶಿವಶಿವ। ದ್ಯಾವ ಕರ್ಮವೋ!

ಭಾವಕೆ ಸಿಲುಕದ ಭವ್ಯ ಚಿದಾತ್ಮನ।

ಭಾವಿಸಿ ಬಂಧವ ಬಾವಿಲಿ ಮುಳುಗುವು|

ದ್ಯಾವ ಕರ್ಮವೋ ॥ಪಲ್ಲವಿ||

ಮೂರು ಗುಣಂಗಳ | ಮೀರಿದ ಶಿವನೊಳು।

ಸೇರದೆ ಮಡಿಯೆಂದು ಹಾರುತ ತಿರುಗುವ ||

ಅಂಡವಿದನು ಪಿಂಡಾಂಡದೊಳರಿಯದೆ।

ಚಂಡಿಸುತೀ ಮಲ। ಭಾಂಡವ ತೊಳೆಯುವ ||೨||

ಈಶನೊಳಿಲ್ಲದ। ಪಾಶವ ಕಲ್ಪಿಸಿ |

ದೋಷಿಯನುತ ಉಪ। ವಾಸದಿ ಬಳಲುವ ||೩||

 

ಒಡಲಿನ ತೊಡಕನು। ಬಿಡಿಸುವ ಗುರುವರ।

ನಡಿಗಳ ಪಿಡಿಯದೆ | ಮಡಿ ಮಡಿ ಎಂಬುವ ||೪||

ಸಾಕ್ಷಿ ಎನಿಸುತೀ ಕುಕ್ಷಿಯೊಳಡಗಿಹ |

ವಿರೂಪಾಕ್ಷನ ಕಾಣದೆ। ಅಕ್ಷತೆ ಎರಚುವ ||೫||

ತಿಳಿಯದೆ ತತ್ತ್ವವ। ಕಳೆಯದೆ ಮೋಹವ

ಸುಳಿಯದೆ ಸುಖದೊಳು|ಚಳಿಯೊಳು ಮುಳುಗುವ||೬||

ಪುರದೊಳು ನೆಲಸಿದ। ಪುರುಷನ ಶೋಧಿಸಿ |

ಹರಿಸದೆ ಜನವ ಮರವನು ಸುತ್ತುವ||೭||

ಎಂದಿಗು ತೊಲಗದೆ। ಬಂದಿರುವೀ ಭವ |

ಬಂಧನವಳಿಯದೆ ವಂದನೆ ಮಾಡುವ||೮||

ಗಾತ್ರದೊಳಿಹ ನಿಜ। ಸೂತ್ರವ ಕಾಣದೆ।

ಪಾತ್ರೆಯ ತೊಳೆಯುತ|ಮೂತ್ರದೊಳುರುಳುವ||೯||

ಸೋಹಂ ಭಾವದೊಳೂಹೆಗೆ ಸಿಲುಕದೆ |

ಮೋಹವ ಹರಿಸದೆ|ದೇಹವ  ಬಾಧಿಪ ||೧೦||

ಕರಣದ ಧರ್ಮದಿ|ಬೆರತು ಮರತು ತನ್ನ।

ನರಕ ನಾಕಗಳಿಗೆ|ತಿರುಗುತ ಬಳಲುವ||೧೧||

ಕಲಿಸಿ ಜಾತಿಯ ಜಲ್ಪಿಸಿ ಭೇದವ|ನಲ್ಪನು ಎನಿಸಿ|

ವಿಕಲ್ಪದಿ ಕೂಡುವ ||೧೨|| 

ನಿತ್ಯ ಚಿದಾತ್ಮನ। ತತ್ತ್ವವನರಿತು ಮ।

ಹತ್ವವ ಪಡೆಯದೆ | ಮೃತಿಕೆಗೆರಗುವ ||೧೩||

ಕೂಡದೆ ಗುರುವನು। ನೋಡದೆ ನಿಜವನು।

ನಾಡಿನ ಶಿಲೆಗಳ। ಬೇಡುತ  ತಿರುಗುವ ||೧೪ ||

ಕರ್ಮದಿ ಬೆರೆಯದ। ನಿರ್ಮಲ ತಾನೆಂಬ|

ಮರ್ಮವನರಿಯದೆ|ಚರ್ಮವ ತೊಳೆಯುವ||೧೫||

ಚಿನುಮಯ ಶಿವ ತನ್ನ|ನೆನೆಯುವ ಮನುಜರ।

ಮನದೊಳು ನೆಲಸಿರೆ|ವನದೊಳು ತಪಿಸುವ||೧೬|| 

ಸ್ಥಿರದೊಳು ಬೆರೆಯದೆ|ಗುರುಶಂಕರನೊಳು|

ಸೆರೆಯೊಳು ಸಿಲುಕುವ ||ಯಾವ ಕರ್ಮವೊ॥೧೭