||ಗೌರಿ ಮಡಿಲಕ್ಕಿ ಹಾಡು ||
ಮಡಿಲಾ ತುಂಬುವೆ ಶ್ರೀ ಗೌರಿ ದೇವಿಗೆ
ಪರಿಮಳದ ಮಲ್ಲಿಗೆಯ ಮುಡಿಸುವೆ ನಿನ್ನ ಮುಡಿಗೆ||ಪ||
ಲಕ್ಷ್ಮಿ ರೂಪದಲ್ಲಿ ಮನೆಗೆ ಬಾರಮ್ಮ
ಅರಿಶಿನ ಕುಂಕುಮವ ಸ್ವೀಕರಿಸಮ್ಮ
ಮುತ್ತೈದೆ ಭಾಗ್ಯ ಸ್ಥಿರವಾಗಿ ಇರುವಂತೆ
ಸೌಭಾಗ್ಯವತಿಯೆಂದು ಹರಸಮ್ಮ ||೧||
ರೇಷ್ಮೆಯ ಕುಪ್ಪಸವ ನಿನಗೆ ತೊಡಿಸುವೆ
ಅಕ್ಕಿ ಕೊಬ್ಬರಿ ಬೆಲ್ಲ ಮಡಿಲಲ್ಲಿ ಇಡುವೆ
ಭಕ್ತಿಯಿಂದಲಿ ನಾ ಸೆರಗೊಡ್ಡಿ ಬೇಡುವೆ
ಸೌಭಾಗ್ಯವತಿಯೆಂದು ಹರಸಮ್ಮ ||೨||
ಭಾದ್ರಪದ ಮಾಸದಲಿ ತದಿಗೆಯ ದಿನದಂದು
ಸಿರಿ ಸಂಪದಗಳನು ಹೊತ್ತು ನೀ ತರುವೆ
ಸುತನನ್ನು ಕರೆಸಿ ಎಲ್ಲರನು ಹರಸಿ
ಸೌಭಾಗ್ಯವತಿಯೆಂದು ಹರಸಮ್ಮ ||೩||
ನಾನಾ ಫಲ ಪುಷ್ಪಗಳ ನೀಡುವೆನಮ್ಮ
ಭಕ್ತಿಯ ಉಡುಗೊರೆಯ ನಿನಗೀವೆನಮ್ಮ
ರತ್ನ ಮಾಲೆ ಧರಿಸಿ ಮನದಲ್ಲಿ ನೆಲೆಸಿ
ಸೌಭಾಗ್ಯವತಿ ಎಂದು ಹರಸಮ್ಮ ||೪||
0 ಕಾಮೆಂಟ್‌ಗಳು